KYKLOS

I

-Sábau 6:47 AM-

Ara qu'está lluviendu,
las luzis los solis que nel alma s'acachan
s'agraban ena retina garraspeandu
cola liherés los solis umiaenti vanguardistas:
tolo que brota duna medra rota
horma el nefelismu nuronal las ideas.
Las notas frotantis del suconcienti
rehuyin de l'aséncia
del questá ispiertu;
ara naidi ama la mántica el sueñu.
Abati son las sieti,
las sieti dun dia orquestal:
frautas que chiribean, los metalufonus chilriantis
de las auhas de tolos relocis
aconllegandu
colos fotonis qu'espanta la lámpara:
lámpara de rayus velozis,
lámpara i truenus que nu reverberan,
lámpara, la parti e la nochi antiriol a las almas.

Tó es hastiosu: el dia rompi nubis
de l'almohá arremollecia
pol ahuncu los que se sueñan;
Los mis ohus son el sol qu'esta deseandu
cruzal la fusca e nubis
hiziendu charabasqueal
las serohas los chapallalis
de tolas oras meteorulóhicas.

Ara que los velsus s'aluengan,
nesezitaria estal a téncias de los caminus
qu'el dia m'ofreci. Agora qu'el ahinaeru es estremu
aprovechu i igu qu'amaneçu.


II

-Urora-

La sotra mañana fi al cielu
de la esquina a pol quilu i meyu e nubis.

Era templanu.
Entavia estaba fechau.
Mentris, asperé nun bancu la plaça,
sintiendu los arañonis nel suelu
que s'efarrapaba sigún
lo hulcaba el luminosu ramahu
daquel varrenderu las oras muertas.


III

-El huegu la ureola-

Un arquitu-Santiagu sin Santiagu,
ni arcu, ni mas curvaturas ocasionalis:
nu prehisu ná desu, nu quiu cachinus de lus,
quiu el huegusempri-chiscanti
que veu ena tu ureola d'urora perpétua.

Almiralti maisimiza el sol qu'emburacu entri vrimbis
i hazi que me repí mas i mas liheru, cola priesa
dun bolindri trunfanti
enhilau pal gua el sueñu.

M'afogan
las llamas inafogonabris
que valsan pola deferéncia temperatura.


IV

-La sabana-

Aurel, una corona,
traiva el lión riba la cabeça
i en rebombándusi trunfal
se hizu sartén, arendi la cual
se fritaba l'aurel ensangrientau
'na fuguera estepária.
El humi, tintu e flama,
duna flama estival,
esborronaba el horizonti
en alparavanis píticus, seña
de las malotias del climi,
de la tosi la serva.
El vuelo dangunas avis, poquinas,
-la pruma prendi-
las mas arriscás, las suicias,
retulaban nel humu sinus
que los diosis i los puetas namás
puein entepretal. Charabasqueaban
fuscus 'na fusca el chanu
milenta d'alimañas.
Orisquicia nuna bacanal
de sonis i carpius. Angora
la luna, asesina d'estrellas,
hieri con habatás de lus
el laurifiru humu
qu'arrebuha a las fieras
i la hangri las vitimas el dia
alimenta la tierra, la cual suavi
se socotrea ahita. Golma
pas. Tierra, humu i cielu,
en coyontura, los andaris son
en que se dispón la Naturaleza.


V

-Avisperinu-

Gomitas escuriá, nochi.

Menus mal qu'al ombri alicuandu
eharras algún sol.


Ismael Carmona García
Mención especial del jurado Premio Ataecina 2007.